Waziri Chongolo Aiomba Benki ya Ushirika Kuimarisha Huduma kwa Wakulima
Dodoma. Waziri wa Kilimo, Daniel Chongolo ameitaka Benki ya Ushirika Tanzania (Coop bank) kuimarisha huduma za kifedha pamoja na wanaushirika ili kufikia malengo yenye tija kwenye sekta ya kilimo nchini.
Waziri Chongolo ameahidi kuendeleza ushirikiano na benki hiyo huku akiwataka watendaji wa Benki ya Ushirika kuongeza ubunifu zaidi katika utoaji wa huduma za kifedha kwa wakulima.
Chongolo ametoa maoni hayo leo Alhamisi Novemba 20, 2025 alipokutana na kufanya mazungumzo na Mkurugenzi wa benki hiyo, Godfrey Ng’urah ofisini kwake jijini Dodoma.
"Ningetamani kuona katika biashara yoyote inayohusu kilimo basi Benki ya Ushirika inakuwa mnufaika wa kwanza," amesema Waziri Chongolo.
Mbali na hilo, Waziri Chongolo amepongeza ukuaji wa kasi wa Benki ya Ushirika Tanzania kwa kutoa majawabu ya mitaji kwa wanaushirika wa kilimo nchini.
Amesema ukuaji huo unatokana na kukuza kiwango cha fedha katika kitabu cha mikopo kutoka shilingi bilioni 15 Januari 2025 hadi sasa kufikia shilingi bilioni 52, sawa na ukuaji wa asilimia 245. Amana pia imeongezeka kutoka shilingi bilioni 19 hadi shilingi bilioni 60, sawa na asilimia 216 ya ukuaji.
Benki hiyo imeendelea kukuza mizania yake kutoka shilingi bilioni 49 Januari 2025 hadi sasa kufikia shilingi bilioni 114, sawa na ukuaji wa asilimia 133. TNC imebaini kuwa hiyo ni hatua nzuri katika kuendelea kutekeleza maelekezo ya Rais Samia Suluhu Hassan wakati wa uzinduzi wa benki hiyo Aprili 28, 2025.
"Ushirika ni kama nyumba yenye msingi imara katika kusaidia wakulima. Ushirika wetu ni wa kilimo kuanzia maandalizi ya shamba hadi kupata matokeo. Hivyo, jambo la msingi ni Benki ya Ushirika kuimarisha huduma za kifedha na wanaushirika ndani yake ili kufikia malengo yenye tija," amesema Chongolo.
Waziri ameahidi kuendeleza ushirikiano na benki hiyo, huku akiwataka watendaji wa Benki ya Ushirika kuongeza ubunifu zaidi katika utoaji wa huduma za kifedha kwa wakulima na wanaushirika.
Kwa upande wake, Mkurugenzi Ng’urah amesema benki yake imeendelea kutekeleza dhamira ya kuchagiza uchumi jumuishi kwa kutoa huduma za kifedha, uwezeshaji wa kujenga maghala na masoko kwa wakulima.
"Tuna matawi manne kwa sasa katika mikoa ya Dodoma, Kilimanjaro, Mtwara na Tabora. Malengo ya benki ni kuongeza matawi mengine manne mwisho wa mwaka katika mikoa ya Dar es Salaam, Kagera, Mwanza na Songwe," amesema Ng’urah.
