Washtakiwa Saba Wafikishwa Mahakamani kwa Mashtaka ya Dawa za Kulevya Dar es Salaam

Dar es Salaam – Mkazi wa Sinza Kijiweni, jijini Dar es Salaam, Cuthbert Kalokola (34) na wenzake sita wamefikishwa katika Mahakama ya Hakimu Mkazi Kisutu, wakikabiliwa na mashtaka saba ya kusafirisha dawa za kulevya aina ya Methamphetamine, Flunitrazepan na bangi.

Mbali na Kalokola, washtakiwa wengine ni Mulhath Abdallah (19) mkazi wa Chamazi; Fredrick Jesca (26) mkazi wa Ubungo; Alphonce Baracka (25) mkazi wa Ubungo Tanesco; Glory Miala (23) mkazi wa Ubungo Darajani; Frank Joachim (25) mkazi wa Namanga Tegeta pamoja na Emmanuel Mapala (25) mkazi wa Ubungo.

Washtakiwa hao wamefikishwa Mahakama Jumatano, Januari 7, 2026 na kusomewa mashtaka ya uhujumu wa uchumi na Wakili wa Serikali Christopher Olembille mbele ya Hakimu Mkazi Mkuu, Romuli Mbuya.

Maelezo ya Mashtaka

Shtaka la kwanza linawashtaki Kalokola na Abdallah kwa kuongoza genge la uhalifu baada ya kukutwa na dawa za kulevya tarehe Novemba 15, 2025 eneo la Sinza D, Wilaya ya Ubungo.

Katika shtaka la pili, Kalokola na Abdallah wanadaiwa kukutwa wakisafirisha gramu 2,160.05 za bangi tarehe hiyo na eneo hilo.

Shtaka la tatu linawashtaki Kalokola na Abdallah kwa kusafirisha dawa za kulevya aina ya Methamphetamine zenye uzito wa gramu 944.47.

Aidha, washtakiwa hao wawili wanadaiwa kusafirisha dawa za kulevya aina ya Flunitrazepan zenye uzito wa gramu 10.03 tarehe na eneo hilo hilo.

Shtaka la tano linamkabili mshtakiwa Jesca peke yake, ambaye Novemba 15, 2025 eneo la Ubungo Kibo, alikutwa akisafirisha dawa za kulevya aina ya bangi zenye uzito wa gramu 42.93.

Shtaka la sita linawashtaki Miala, Joachim na Mapala, ambao Novemba 15, 2025 eneo la Ubungo Kibo karibu na Tanesco, wanadaiwa kusafirisha gramu 116.12 za bangi.

Shtaka la saba linamkabili Mapala, ambaye Novemba 14, 2025 eneo la Uhasibu alikutwa na gramu 24 za bangi.

Hali ya Mahakama

Washtakiwa hawakutakiwa kujibu chochote kwa kuwa Mahakama hiyo haina uwezo wa kusikiliza kesi ya uhujumu wa uchumi isipokuwa kwa kibali maalumu. Upande wa Jamhuri ulieleza kuwa upelelezi wa kesi hiyo haujakamilika na hivyo kuomba Mahakama ipange tarehe nyingine.

Washtakiwa waliomba wapewe dhamana baada ya kusomewa mashtaka. Mshtakiwa Kalokola anatetewa na Nashoni Nkungu huku Abdallah akitetewa na Wakili Hassan Chande. Washtakiwa wa tatu hadi wa saba wanajitetea wenyewe kwa kukosa watetezi.

Uamuzi wa Dhamana

Hakimu Mbuya aliamua kuwa washtakiwa Kalokola na Abdallah hawana dhamana kutokana na dawa walizoshtakiwa nazo hazina dhamana kwa mujibu wa sheria.

Hata hivyo, washtakiwa wa tatu hadi wa saba, mashtaka yao yanadhaminika na Hakimu alitoa masharti manne ya dhamana:

• Kila mshtakiwa anatakiwa kuwasilisha fedha taslimi Sh5 milioni au mali isiyohamishika yenye thamani hiyo
• Wanatakiwa kuwa na wadhamini wawili wenye barua za utambulisho kutoka Serikali za mitaa na watasaini bondi ya Sh10 milioni
• Kukabidhi Mahakama hati zao za kusafiria kama wanazo
• Kutoruhusiwa kutoka nje ya Mkoa wa Dar es Salaam bila kibali cha Mahakama

Washtakiwa wanne wameshindwa kutimiza masharti ya dhamana na hivyo kurudishwa rumande.

Kesi hiyo itatajwa tena Mahakamani tarehe Januari 22, 2026.