SGR: TRC Yaeleza Sababu za Kusimamisha Safari, Waziri Mkuu Ahakikishia Usalama

Dar es Salaam/Dodoma – Shirika la Reli Tanzania (TRC) limeeleza kuwa kusimamishwa kwa huduma za Reli ya Kisasa (SGR) hakuhusiani na kasoro za usanifu au ujenzi, bali ni hatua ya tahadhari baada ya kumomonyoka kwa kingo za mto lilikopita daraja la reli.

Mkurugenzi Mkuu wa TRC, Machibya Masanja, amesema uamuzi wa kusimamisha huduma ulichukuliwa kwa lengo la kuimarisha kingo za mto zilizomomonyoka na kuwaepusha wananchi dhidi ya hatari za kiusalama.

Sababu za Kusimamisha Safari

Desemba 31, 2025, TRC ilitangaza kusitisha safari za SGR kati ya Morogoro-Dodoma na Dodoma-Morogoro, ikitaja sababu ni uharibifu wa miundombinu uliosababishwa na mvua katika maeneo ya Kidete wilayani Kilosa mkoani Morogoro na Godegode, wilayani Mpwapwa, mkoani Dodoma.

Masanja ameeleza kuwa kilichotokea ni kumomonyoka kwa kingo za mto lilipo daraja, jambo lililosababishwa na maji ya mvua yaliyoambatana na uchafu na mchanga ambao ni matokeo ya shughuli za binadamu.

"Reli haijakatika, ambacho kimetokea ni kwamba kuna mto kingo zake zimemomonyoka, kwa ajili ya usalama wa wananchi na vifaa tukasema tusimamishe huduma ili turekebishe na kuepusha hatari," amesema Masanja.

Ufafanuzi wa Kiufundi

Mkurugenzi Mkuu wa TRC amesisitiza kuwa mradi wa SGR ulifanya upembuzi yakinifu kabla ya ujenzi, akieleza kuwa msingi wa daraja lililojengwa umejengwa mita 30 kwenda chini sawa na nyumba ya ghorofa 10 au zaidi.

"Daraja limejengwa kuhimili miaka 120 ijayo kwa hiyo haliwezi kukatika. Nguzo zinaenda chini kati ya mita 30 hadi 40, hivyo hakuna namna zitakatika kabla ya miaka 120," ameeleza.

Masanja amesema baada ya kusimamisha huduma, wanaangalia uwezekano wa kurekebisha ili kuepusha hatari tarajiwa, akisisitiza kuwa haihusiani na kasoro za usanifu wala upembuzi yakinifu wa mradi.

Waziri Mkuu Ahakikishia Usalama

Akizungumza katika ziara eneo lililoathirika Januari 2, Waziri Mkuu, Dk Mwigulu Nchemba, amesema ni hatua nzuri kuwa na taarifa za mapema kabla hatari haijatokea kwa kuwa inanusuru wananchi.

"Ikitokea mvua ya upepo inayotikisa nyaya, mtiririko wa umeme hautakuwa wa kawaida. Hata mashirika makubwa ya ndege ya kimataifa ikitokea mvua kubwa ya upepo huahirisha safari," amesema Dk Mwigulu.

Waziri Mkuu ametaka wataalamu wakamilishe masuala ya kitaalamu ili ujenzi wa mabwawa uanze na kupatikana suluhu ya kudumu ya kuhifadhi maji.

Mpango wa Ujenzi wa Mabwawa

Dk Mwigulu amesema ujenzi utaanza Kidete ambako tayari fedha zipo na kisha utatumika utaratibu kupata fedha za kukamilisha mabwawa mengine saba na kupatikana suluhu ya kudumu.

"Wapo ambao wanafurahia watu wakipata matatizo na kusherehekea na kukejeli. Nataka niwaambie, Serikali haijalala. Kwa sasa yanafanyika masuala ya kitaalamu na kumpata mkandarasi wa kuanza kujenga," amesema.

Amewahakikishia wananchi kuwa Serikali imeshachukua hatua za kupata suluhu ya kudumu, akieleza zimeshatolewa Sh23 milioni kwa ajili ya kuongezea fedha za kuwahamisha na kuwapatia waathirika misaada ya kibinadamu.

Changamoto za Tiketi

Baadhi ya abiria wameeleza ugumu wa kupata tiketi za SGR wanapozihitaji ndani ya saa 24, malalamiko ambayo TRC limekiri kuwapo kwa changamoto hiyo, likipanga kuimaliza kwa kuongeza ruti kuanzia wiki ya tatu ya mwezi huu.

Masanja amekiri kuwapo mahitaji makubwa ya usafiri kulinganisha na idadi ya ruti za treni hiyo.

"Ni kweli mahitaji ni makubwa, hata hivyo TRC tumeanza kulifanyia kazi, tuko katika hatua za mwisho mwisho za kiufundi ili kuongeza ruti kutoka Dar es Salaam kwenda Dodoma na kutoka Dodoma kwenda Dar es Salaam," amesema.

Amesema wiki ya tatu ya Januari mchakato huo utakuwa umekamilika na kuanzia wiki ya nne wataongeza ruti za safari ili kukidhi mahitaji ya abiria.