Mahakama Yapanga Kusikiliza Kesi ya Uchepushaji Fedha Sh165 Milioni Kigamboni

Dar es Salaam – Mahakama ya Hakimu Mkazi Kisutu imepanga tarehe 13 Januari 2026 kuanza kusikiliza ushahidi wa upande wa Jamhuri katika kesi ya kuchepusha fedha na kuisababishia Wizara ya Tamisemi hasara ya shilingi milioni 165, inayowakabili washtakiwa 13, wakiwemo wakuu wa idara wa Manispaa ya Kigamboni.

Hatua hiyo inatokana na upelelezi wa kesi hiyo kukamilika na washtakiwa kusomewa maelezo ya mashahidi na vielelezo.

Washtakiwa katika kesi ya uhujumu uchumi namba 21510 wa mwaka 2025 ni aliyekuwa Mkuu wa Idara ya Fedha na Mhasibu wa Manispaa ya Kigamboni, Jonathan Manguli (38).

Wengine ni aliyekuwa Mhasibu wa Manispaa hiyo Godfrey Martiny (44), aliyekuwa Mkuu wa Kitengo cha Udhibiti Taka na Usafi wa Mazingira wa Manispaa hiyo, Juvenalis Mauna (53), Josephat Mutembei (39) na aliyekuwa Ofisa Ugavi Msaidizi wa Manispaa hiyo, Bibiana Mdete (53).

Pia yupo aliyekuwa Ofisa Ugavi, Henry Rugayi (38), Annie Maugo (43), Ofisa Hesabu kutoka Tamisemi Dodoma, Tumsifu Christopher (46) na Ofisa Hesabu, Aidan Mpozi (61) wote kutoka Manispaa ya Kigamboni.

Wengine ni wafanyabiashara Hamis Manfred (40), Paulo Mwakyusa (43), Godwin Cheyo (33) na Jennifer Manguli (30).

Mashtaka Dhidi ya Washtakiwa

Washtakiwa hao wanakabiliwa na mashtaka 10 yakiwemo kutakatisha fedha, kuongoza genge la uhalifu na kufanya ubadhilifu katika Mahakama ya Hakimu Mkazi Kisutu.

Uamuzi huo umetolewa Jumatatu, Desemba 29, 2025 na Hakimu Mkazi Mkuu, Hassan Makube wakati kesi hiyo ilipoitwa kwa ajili ya washtakiwa kupewa nyaraka za zitatkazotumiwa na upande wa mashtaka katika kesi hiyo.

Hakimu Makube alisema upande wa Jamhuri utawapatia nyaraka hizo washtakiwa hao tarehe 6 Januari 2026 na kisha kesi hiyo itaanza kusikilizwa ushahidi tarehe 13 Januari 2026.

Wakili wa Serikali, Eric Davies aliieleza Mahakama kuwa kesi hiyo iliitwa kwa ajili ya washtakiwa kupewa nyaraka za maelezo ya mashahidi kabla ya kesi hiyo kuanza kusikilizwa.

Hata hivyo, Wakili Davies aliieleza mahakama kuwa nyaraka hizo bado hazijakamilika kuchapwa hivyo aliomba mahakama ipange tarehe nyingine kwa ajili ya washtakiwa hao kupewa nyaraka hizo.

Baada ya kutoa taarifa hiyo, Hakimu Makube alimuelekeza awasiliane na mchapaji ili wajue nyaraka hizo zitakuwa tayari lini. Jamhuri iliieleza mahakama kuwa nyaraka hizo zitakuwa tayari tarehe 6 Januari 2026.

"Naelekeza Januari 6, 2026, saa nane mchana, washtakiwa mtapewa nyaraka zenu na Januari 13, 2026 kesi itaanza kusikilizwa ushahidi wa Jamhuri," alisema Hakimu Makube kabla ya kuahirisha kesi hiyo.

Maelezo ya Mashtaka

Kati ya mashtaka hayo 10, matatu ni ya kutumia nyaraka kwa lengo la kupotosha mwajiri wao, mawili ni ya kuongoza genge la uhalifu, mawili ni ya ubadhilifu wa fedha, moja ni kuchepusha fedha, kutakatisha fedha na kuisababishia hasara Tamisemi.

Katika kesi ya msingi, washtakiwa wanakabiliwa na shtaka la kuongoza genge la uhalifu linalowakabili washtakiwa wanane ambao ni Manguli, Martiny, Mauna, Mutembei, Rugayi, Maugo na Kachira. Wanadaiwa kati ya Julai 1, 2022 na Desemba 30, 2023 maeneo mbalimbali ya Jiji la Dar es Salaam na Dodoma, wakiwa watumishi wa umma kwa kuvunja sheria na kushindwa kutimiza majukumu yao walifanya ubadhilifu wa fedha kiasi cha shilingi milioni 165.

Shtaka la pili ni kuongoza genge la uhalifu linalowakabili wafanyabiashara wanne ambao ni Manfred, Mwakyusa, Cheyo na Manguli ambao wanadaiwa kati ya Julai 1, 2022 na Desemba 30, 2023 ndani ya Jiji la Dar es Salaam, wakiwa sio watumishi wa umma na kwa kushirikiana na watumishi wa umma, kwa makusudi waliongoza genge la uhalifu kwa kufanya ubadhilifu wa fedha kiasi cha shilingi milioni 165.

Shtaka la tatu ni kuchepusha fedha linalowakabili washtakiwa Maugo, Kachira na Mpozi, ambapo wanadaiwa kati ya Julai 1, 2022 na Septemba 5, 2023 katika ofisi za Tamisemi Dodoma, wakiwa wahasibu, kwa maslahi yao binafsi walichapisha na kuhamisha fedha kiasi cha shilingi milioni 165, ambazo zilitakiwa zitumike kwa ajili ya miradi mbalimbali ya Tamisemi.

Shtaka la nne ni ubadhilifu wa fedha linalowakabili washtakiwa Manguli, Martiny na Mauna, ambapo wanadaiwa kati ya Septemba 5, 2022 na Desemba 30, 2023 katika ofisi za Manispaa ya Kigamboni wakiwa watumishi wa Manispaa hiyo, kwa nyadhifa zao za uhasibu, mkuu wa idara ya fedha na mkuu wa idara ya udhibiti taka na usafi wa mazingira, walibadilisha matumizi ya shilingi milioni 128 kwa maslahi yao binafsi, fedha ambazo ziliwafikia mikononi mwao kama wahasibu.

Pia, kati ya Septemba 5, 2022 na Desemba 30, 2023 katika ofisi za Manispaa ya Kigamboni, wakiwa wahasibu walifanya ubadhilifu kwa kubadilisha fedha kiasi cha shilingi milioni 36.8, fedha ambayo iliwafikia mikononi mwao kama wahasibu.

Shtaka la sita ni matumizi ya nyaraka kwa nia ya kumposha mwajiri wao ambaye ni Manispaa ya Kigamboni inayowakabili Manguli na Mutembei, ambapo wanadaiwa Februari 2, 2023 katika ofisi za Manispaa hiyo, kwa nafasi zao za mhasibu na mhandisi na kwa nia ovu walimdanganya mwajiri wao kwa kutumia nyaraka iliyokuwa na taarifa zisizosahihi za ukaguzi wa vifaa, kuonyesha mkandarasi ameshusha tripu 220 za moramu na kukodi greda kutoka kampuni ya Konya Investment Co Ltd.

Shtaka la saba ni matumizi ya nyaraka kwa nia ya kumposha mwajiri, linalomkabili Mdete, ambapo Februari 2, 2023 katika ofisi za Manispaa ya Kigamboni, mshtakiwa akiwa Ofisa Ugavi Msaidizi, kwa nia ovu dhidi ya mwajiri wake, alitumia nyaraka iliyokuwa na taarifa potofu ya vifaa kuonyesha mkandarasi ameshusha tripu 220 za moramu na kukodi greda kutoka kampuni ya Konya Investment Co Ltd, wakati wakijua kuwa wanampotosha mwajiri wao.

Vilevile, mshtakiwa Rugayi anadaiwa Machi 27, 2023 katika ofisi za Manispaa hiyo, akiwa Ofisa Ugavi aliwasilisha nyaraka iliyokuwa na taarifa potofu ya vifaa, akionyesha kampuni ya Mbogholo Investment imepeleka tripu ya moramu kwenye lori moja la futi 12 na kukodi greda, wakati akijua anampotosha mwajiri wake.

Shtaka la tisa ni kutakatisha fedha linalowakabili washtakiwa 12, isipokuwa mshtakiwa wa tano (Mdete) ambapo kati ya Julai 1, 2022 na Desemba 30, 2023 katika Jiji la Dar es Salaam na Dodoma, washtakiwa walijihusisha na muamala wa fedha kiasi cha shilingi milioni 165, wakati wakijua fedha hizo ni mazalia ya kosa tangulizi la uchepushaji fedha.

Pia, washtakiwa wote wanadaiwa katika kipindi hicho, kwa pamoja na huku wakifahamu na kwa nia ovu waliisababishia hasara Tamisemi ya shilingi milioni 165.

Hata hivyo, mshtakiwa Mdete yupo nje kwa dhamana baada ya kutimiza masharti ya dhamana na pia hana shtaka la kutakatisha fedha.

Kwa mara ya kwanza, washtakiwa hao walifikishwa mahakamani Septemba 3, 2025 na kusomewa kesi ya uhujumu uchumi namba 21510 wa mwaka 2025.