Marekani Yaondoa Viza kwa Tanzania na Nchi 14 Nyingine

Dar es Salaam – Katika hatua mpya za kuimarisha sera za uhamiaji, Marekani imeondoa viza kwa mataifa 15, ikiwa ni pamoja na Tanzania, kuzuia makundi fulani ya wageni kuingia nchini humo.

Zuio hilo limelenga makundi maalum ya viza ikiwemo viza B-1 inayohusu wageni wa kibiashara, viza B-2 inayohusu wageni wa kutalii, viza F inayohusu wanafunzi wa kitaaluma, viza M inayohusu wanafunzi wa ufundi wa masomo yasiyo ya kitaaluma na viza J inayohusu wageni wa kubadilishana uzoefu.

Kwa mujibu wa taarifa rasmi ya Ikulu ya Marekani, sababu kuu ya kuondoa makundi haya ya viza ni kutokana na waombaji kupitiliza muda wa ruhusa iliyotolewa na kukaa bila idhini.

Takwimu za Tanzania

Kwa upande wa Tanzania, taarifa ya Ikulu ya Marekani imebainisha kuwa wanaokaa kupitiliza muda wa ruhusa iliyotolewa kwenye viza wamezidi hadi asilimia 8.30 kwa wahamiaji wa makundi ya viza ya B-1 na B-2 huku kwa makundi ya viza F, M na J wakifikia asilimia 13.97.

Mataifa mengine yaliyoondolewa viza za kwenda katika nchi hiyo ni Angola, Antigua, Barbuda, Benini, Ivory Coast, Dominica, Gabon, Gambia, Malawi, Mauritania, Nigeria, Senegal, Tonga, Zambia na Zimbabwe.

Sababu za Mabadiliko

Marekani imesema kuondolewa kwa viza kwa mataifa hayo ni juhudi za nchi hiyo kuimarisha ulinzi na usalama, ikitaja kuwa wahamiaji wengi wanapoingia Marekani wanakaa kwa muda mrefu bila kurudi katika mataifa yao.

Maelezo ya Aina za Viza

Viza ya B-1 (Mgeni wa Biashara)

Viza hii hutolewa kwa raia wa kigeni wanaotaka kuingia Marekani kwa muda kwa ajili ya shughuli halali za kibiashara au kitaaluma, bila kujihusisha na ajira yenye malipo.

Viza ya B-2 (Mgeni wa kutembea)

Viza hii hutolewa kwa watu wanaosafiri kwenda Marekani kwa madhumuni ya utalii, mapumziko, matibabu au kutembelea familia na marafiki, kwa kipindi cha muda.

Viza ya F (Mwanafunzi wa masomo ya kitaaluma)

Viza ya F imetengwa kwa wanafunzi wa kimataifa waliokubaliwa katika taasisi za elimu zilizoidhinishwa nchini Marekani na wanaokusudia kusoma masomo ya kitaaluma kwa muda wote.

Viza ya M (Mwanafunzi wa mafunzo ya ufundi au yasiyo ya kitaaluma)

Viza hii inahusu watu waliojiandikisha katika programu zinazotambulika za mafunzo ya ufundi au kiufundi nchini Marekani, zisizo za masomo ya kitaaluma au lugha.

Viza ya J (Mgeni wa kubadilishana uzoefu)

Viza ya J hutolewa kwa washiriki wa programu zilizoidhinishwa za kubadilishana kitamaduni na kielimu, ikiwamo wasomi, watafiti, wanafunzi wa mafunzo kwa vitendo, na wataalamu wengine, kwa lengo la kuimarisha uelewano wa pamoja.