Waziri Ulega Abaini Ubadhirifu wa Sh2.5 Bilioni Katika Temesa
Dar es Salaam – Waziri wa Ujenzi, Abdallah Ulega amesema wizara imebaini tuhuma za ubadhirifu wa Sh2.5 bilioni ndani ya Wakala wa Ufundi na Umeme (Temesa) kufuatia uchunguzi wa awali uliofanyika baada ya kupokelewa barua ya wananchi iliyowasilishwa kwa Rais Samia Suluhu Hassan.
Akiwa katika ziara ya kukagua miradi ya ujenzi wa vivuko Kigamboni, Ulega amesema uchunguzi wa awali wa wizara ulibaini kuwepo kwa uzembe na matumizi mabaya ya fedha ndani ya shirika hilo, jambo lililosababisha kufukuzwa kazi kwa viongozi waliokuwa wakikwamisha kasi ya maendeleo.
"Uchunguzi wetu umebaini udhaifu mkubwa na ubadhirifu wa takribani Sh2.5 bilioni tayari tumeunda kamati maalumu, tumewapa siku saba kukamilisha kazi yao. Atakayebainika kuhusika, atafikishwa moja kwa moja mahakamani," amesema Waziri Ulega.
"Barua ile imeonesha uzembe kwa wafanyakazi, ubadhirifu wa mali ya umma na upendeleo kwenye mambo ya kuuziana zabuni," ameongeza.
Ameendelea kusema endapo uchunguzi ukifanyika vizuri kuna uwezekano wa kufika hadi Sh5 bilioni ya upotevu wa fedha hizo.
Mradi wa Kivuko Nyinyi Nyamisati Nyuma ya Wakati
Katika ziara hiyo iliyofanyika Desemba 7, 2024, kwenye eneo la Mji Mwema, Kigamboni, Waziri Ulega ametembelea pia ujenzi wa kivuko cha Nyinyi Nyamisati kinachotarajiwa kuunganisha Mafia na Nyamisati, na kukuta mradi ukiwa nyuma ya wakati.
Hata kama taarifa za awali zilionyesha mradi ungekamilika Desemba 31, 2025, alielezwa kuwa sasa unatarajiwa kukamilika Mei 2026 na utekelezaji wake umefikia asilimia 57.
"Nimekuta mradi upo asilimia 57 bado mpo nyuma, mchangamke," amesema. Kivuko hicho kinatarajiwa kubeba abiria 300, tani 120 za mizigo na sehemu ya kuhifadhi maiti wakati wa kusafirishwa.
Kaimu Mtendaji Mkuu wa Temesa, Moses Rajabu, amesema mradi huo unagharimu Sh9.4 bilioni ambapo Sh4.3 bilioni tayari zimelipwa. Ameeleza kuwa ujenzi ulianza chini ya mkandarasi kutoka Korea akishirikiana na wazawa, lakini kutokana na kusuasua, mkandarasi mwingine aliingizwa kuendeleza kazi.
Msongamano Darajani na Barabara ya Mandela
Ulega ameeleza kuwa msongamano katika eneo la Darajani na Barabara ya Mandela umegeuka kero kubwa kwa wananchi, hivyo ameagiza kufanyika kwa majadiliano ya kina kati ya wizara husika ili kupata suluhisho la kudumu.
Naye Mbunge wa Kigamboni, Sanga Nyakisa, ameiomba wizara kuboresha huduma za vivuko katika wilaya hiyo, akisema changamoto hizo zimekuwa sugu kwa wananchi.
Wananchi Waomba Huduma ya Saa 24
Katika mazungumzo na wananchi, kero mbalimbali zimewasilishwa kwa Waziri Ulega, ambapo Masudi Manya ameomba kuondolewa kwa foleni na kufutwa muda wa mwisho wa kuvuka, akitaka huduma ya kivuko itolewe saa 24.
"Kwa sasa hatuna shida kubwa na kivuko lakini tunaomba vivuko vifanye kazi kwa saa 24, hili suala la mwisho saa tano usiku linatutesa kwani kuna wakati inatulazimu kuacha mambo yetu ili tuwahi kuvuka," amesema Manya.
