Gambia Yachagua Uongozi Mpya wa Tume ya Misitu na Wanyamapori Afrika

Katibu Mkuu wa Wizara ya Mazingira wa Gambia, Ebrima Jawara amechaguliwa kuwa Mwenyekiti wa mkutano wa 25 wa Tume ya Misitu na Wanyamapori Afrika (AFWC25) na wiki ya tisa ya Misitu na Wanyamapori Afrika (AFWW9).

Jawara anachukua nafasi ya Kamishna wa Uhifadhi wa Wakala wa Huduma za Misitu Tanzania (TFS), Profesa Dos Santos Silayo ambaye amemaliza muda wake wa uongozi.

Uchaguzi huo umefanyika katika mkutano unaoendelea Banjul nchini Gambia na utamalizika Desemba 5, 2025. Wajumbe wamempongeza Profesa Silayo kwa uongozi wake katika kipindi kilichotawaliwa na changamoto za mabadiliko ya tabianchi, ukataji misitu na migogoro ya matumizi ya ardhi.

Utaratibu wa Uchaguzi Unaofuata Miongozo ya Kikanda

Uchaguzi huo ulioongozwa na Edward Kilawe, Katibu wa Tume kutoka Ofisi ya Shirika la Chakula na Kilimo (FAO) Kanda ya Afrika, ulihusisha wajumbe kutoka zaidi ya nchi 45 na kupewa uzito mkubwa kutokana na umuhimu wake katika kulinda misitu, kuimarisha takwimu za ufuatiliaji na kuongeza ushiriki wa jamii.

Akifungua mchakato wa uchaguzi, Kilawe alieleza utaratibu wa kugawa nafasi za uongozi kwa kanda nne za Afrika. Rwanda iliidhinishwa kuwa makamu mwenyekiti kwa Kanda ya Afrika Mashariki, hatua iliyoungwa mkono na Sudan Kusini.

Katika Kanda ya Kusini, Afrika Kusini ilimteua Pumeza Nodada, Mkurugenzi Mkuu wa Idara ya Mazingira, Misitu na Uvuvi, huku pendekezo la Zimbabwe likisababisha mashauriano ya faragha kabla ya kufikiwa kwa mwafaka.

Kanda ya Afrika ya Kati iliunga mkono kwa wingi uteuzi wa Chad, hatua iliyotafsiriwa kama ishara ya umoja na mshikamano wa kikanda. Wajumbe waliidhinisha uteuzi wa Munchan kutoka Burkina Faso kuwa mwandishi wa taarifa, hatua inayoendeleza msukumo wa kuongeza usawa wa kijinsia katika nafasi za kiufundi.

Wito wa Kutumia Sayansi na Ubunifu Katika Uhifadhi

Katika hotuba yake ya kuhitimisha uenyekiti, Profesa Silayo aliwataka viongozi wa bara hilo kuimarisha matumizi ya mifumo ya kisayansi, ubunifu na ushirikiano wa kikanda ili kukabili kasi ya ukataji misitu, kupungua kwa bioanuwai na kuongezeka kwa migongano kati ya binadamu na wanyamapori.

"Usimamizi wa rasilimali unakabiliwa na mabadiliko ya tabianchi na mienendo mipya ya kibinadamu. Hali hizi zinahitaji fikra mpya, mbinu bunifu na suluhu zinazotekelezeka," alisema.

Alisisitiza uongozi mpya unapaswa kuipa kipaumbele teknolojia za uchunguzi wa misitu, programu za urejeshaji wa mazingira na kuimarisha ufadhili kwa uhifadhi unaoshirikisha jamii.

Changamoto za Miaka Ijayo

Kwa upande wake, Kilawe aliwakumbusha wajumbe kuwa miaka ijayo itakuwa muhimu kwa Afrika kutokana na ongezeko la shinikizo la masoko ya kaboni, upotevu wa misitu na kupungua kwa makazi ya wanyamapori.

Baada ya kuchaguliwa, Jawara alianza rasmi majukumu yake kwa kuongoza mjadala wa tathmini ya utekelezaji wa maazimio ya mkutano uliopita, ikiwa ni hatua muhimu kuelekea kuandaa dira mpya ya usimamizi wa misitu kabla ya mkutano wa FAO Kanda ya Afrika wa 2026.

Mkutano wa AFWC25 unaendelea jijini Banjul hadi Desemba 5, 2025, ukitarajiwa kutoa uamuzi utakaobadili mwelekeo wa uhifadhi wa misitu na wanyamapori Afrika.