Viongozi wa Vyama vya Ushirika Watakiwa Kuimarisha Uadilifu
Moshi – Viongozi wa vyama vya ushirika nchini wametakiwa kuimarisha uadilifu kwa kuzingatia kanuni, sheria na taratibu zinazosimamia sekta hiyo, ili kuchochea maendeleo endelevu kwa vyama hivyo na wanachama wake.
Rai hiyo imetolewa Novemba 30, 2025 na Ofisa Ushirika Mwandamizi kutoka Tume ya Maendeleo ya Ushirika, George Bisan wakati akizungumza katika mkutano wa kawaida wa mwaka wa Chama cha Akiba na Mikopo cha Tumaini Saccos.
Bisan amesema ufuatwaji wa kanuni na miongozo ya ushirika ni nguzo muhimu ya ukusanyaji wa fedha, uaminifu na uimarishaji wa huduma za vyama hivyo.
"Ni muhimu sana vyama vya ushirika vikazingatia sheria. Lakini pia wanachama wanapaswa kuwa waaminifu hasa kwenye suala la mikopo. Ukichukua mkopo lazima urejeshwe kwa wakati ili kuimarisha mtiririko wa fedha," amesema.
Amesema viongozi wanapaswa kutoa elimu endelevu kwa wanachama wasiokuwa waadilifu ili kujenga nidhamu na kuzuia viashiria vya uharibifu wa mali za chama.
Changamoto za Mikopo
Kwa upande wake, Mwenyekiti wa muda wa mkutano huo, Loy Sanana, amesema changamoto kubwa inayoikumba Saccos hiyo ni baadhi ya wanachama kushindwa kurejesha mikopo kwa wakati, hali inayoathiri mtiririko wa fedha na uwezo wa kutoa huduma.
"Kuna wanachama wanakimbia mikopo, na wengine wakifuatwa majumbani wanajifanya kupoteza fahamu ili kuepuka kulipa. Hii imekuwa changamoto kubwa," amesema.
Akitaja mafanikio ya Tumaini Saccos, Sanana amesema wanachama waliotumia mikopo kwa uaminifu wamefanikiwa kusomesha watoto hadi vyuo vikuu, kujenga nyumba za kisasa na kuanzisha miradi mbalimbali ya kiuchumi.
Ongezeko la Mtaji
Mwenyekiti wa muda wa Bodi, Elisonguo Shayo, amewataka wanachama kutumia fedha za mikopo kwa malengo yaliyokusudiwa na kuhakikisha wanafanya marejesho kwa wakati ili kuepuka madeni mabaya.
Amesema hadi sasa Saccos ina wanachama hai 1,200, ambapo imetoa mikopo ya zaidi ya Sh150 milioni na mtaji wake umeongezeka hadi Sh200 milioni.
"Tunawahimiza wananchi kujiunga na Saccos ili kushirikiana kupambana na umaskini. Wanachama wajenge nidhamu ya fedha na kuongeza hisa na akiba ili kuimarisha uwezo wa kukopeshana," amesema Shayo.
Mafanikio ya Wanachama
Mwanachama Hubart Heriel amepongeza mageuzi yanayoendelea chini ya uongozi wa mpito akibainisha kuwa hapo awali kulikuwepo na hatari ya chama kudidimia kutokana na dosari za uongozi uliopita.
Amesema nidhamu, uaminifu na malengo ya pamoja ni silaha muhimu za kuimarisha chama.
Naye mwanachama Heaven Maleko amesema Saccos imemwezesha kuinua maisha yake kwa kununua kiwanja, kujenga nyumba na kusomesha watoto wake.
Amesisitiza wanachama kuepuka kukopa kwa mkumbo na kuhakikisha wanaongeza hisa na akiba ili kuongeza uwezo wa kukopa na kupanua miradi ya kiuchumi.
