Uchaguzi wa Tanzania: Siku ya Demokrasia na Matarajio ya Wananchi

Leo ni siku ambayo Watanzania wamekuwa wakiisubiri kwa hamu kubwa. Siku ya kushiriki kidemokrasia kupitia uchaguzi wa viongozi watakaotupeleka kwenye hali bora zaidi ya huko tulikotoka.

Tukio kama la leo lilifanyika miaka mitano iliyopita, na litakuja kujirudia miaka mitano inayokuja. Wengi wamelisubiri kwa hamu, wakitarajia mabadiliko makubwa nchini.

Walioshiriki zoezi hili mara kadhaa wanaona kama mambo yanakwenda yakijirudia. Yamekuwa ni mazoea ya Watanzania kuuchukulia uchaguzi kama mwanzo mpya.

Ahadi za Kampeni na Matarajio ya Wananchi

Baada ya hali ngumu, wagombea wanaahidi kupitia mikutano ya kampeni kwamba wamekuja kuyarekebisha matatizo. Wanadai kuwa safari hii wana mbinu mpya za kuweka mambo sawa.

Mtaani, kila anayesikia ahadi hizi anaondoka na lake. Wapo wanaopata matarajio makubwa yanayowawekea tamaa ya mafanikio. Hawa wanategemea kujengewa viwanda na kupata huduma zote bure.

Lakini wengine wanakariri kuwa baada ya uchaguzi, ahadi nyingi zinaenda likizo ndefu kusubiri uchaguzi unaofuata. Hao ndio wanaowaza "labda safari hii" au "labda mgombea yule" katika kila msimu.

Changamoto za Watanzania

Matatizo ya Watanzania ni mengi kiasi cha kutoweza kuelezeka kwa siku moja. Kama yalivyo maisha, kila siku ina changamoto zake. Kuna changamoto zilizoanza kabla ya siku hiyo, kuna zilizozaliwa na changamoto za kale, na pia kuna zingine mpya kabisa zinazoibuka.

Ni kama ngoma isiyoisha; kila mzunguko una midundo mipya. Jana ilikuwa maji, leo ni barabara, kesho ni afya, keshokutwa ni bei ya sukari.

Haya matatizo hufanana kama ndugu wa familia moja. Ukilitatua moja, mengine matatu yanakuja kuziba pengo kwa kupokezana. Waswahili husema "haba na haba hujaza kibaba," na ndio yanayotokea.

Utajiri wa Tanzania

Tanzania haina shida kubwa kama zilivyo nchi zingine zenye majangwa, ukame, matetemeko ya ardhi, au mafuriko ya mfululizo. Badala yake nchi imetunukiwa kila aina ya utajiri kwa maana ya madini na rasilimali nyingine. Tena kwa bahati nzuri wakazi wake ni wasikivu na wanaoishi kwa kuvumiliana.

Pamoja na kutokubaliana juu ya mambo fulani, wanaitikia miito ya kudumisha amani na utulivu huku wakitafuta suluhu ya matatizo yao.

Wajibu wa Viongozi Wapya

Muda mfupi kutoka sasa matangazo ya washindi wa mbio za uchaguzi yatatolewa. Washindi watakuwa viongozi wetu kwa awamu ingine ya miaka mitano.

Viongozi hao wanatarajiwa kuziishi ahadi zao na kutorudia makosa yaliyofanywa mwanzoni. Makosa makubwa ni ya baadhi ya viongozi wasiotimiza wajibu wao ipasavyo.

Kiongozi hatakiwi kulala fofofo na kudhani matatizo yatakuja kwa miadi. Akeshe akishughulika na matatizo ya awali kabla hayajazaa mengine. Hii itamsaidia kushughulikia matatizo mapya kabla nayo hayajaanza uzazi.

Changamoto za Kisasa

Baada ya uchaguzi, viongozi watapata nafasi ya kujikita kwenye mapambano dhidi ya mabadiliko ya kiulimwengu. Wanahitaji utamaduni wa kuyamaliza matatizo kwa wakati.

Hivi sasa tuna mengi mapya kama ukuaji wa kasi wa teknolojia na mabadiliko ya hali ya nchi. Haya yanahitaji uwajibikaji kamilifu kwa sababu hayatawaachia muda wa kushughulikia changamoto zilezile za ukosefu wa maji, afya na elimu.

Wito kwa Wapiga Kura

Wagombea wote wameshajinadi kwa uwezo wao. Sasa jukumu la mwananchi ni kutumia haki yake ya kikatiba. Amebakiwa na kazi ya kumchagua yule anayemwona ana nia ya dhati na uwezo wa kuongoza njia. Asimchague kwa sababu ya kulipa, kofia au wali wa kampeni. Achague mtu mwenye nia ya kweli.

Kwa mpigakura; ukiona mgombea hakufai achana naye kwa heri. Kamwe usijiingize kwenye mkondo wowote wa uvunjifu wa amani.

Jitazame nafsi yako na ukumbuke kuwa una watu wanaokuhusu na kukutegemea. Si uungwana kuwafanya nao wateseke kutokana na maamuzi yako binafsi.

Kulinda Amani Baada ya Uchaguzi

Kwa wale ambao wagombea wao hawatashinda, tulieni. Msilete nogwa wala msipige kelele kana kwamba dunia imeanguka. Demokrasia siyo vita, ni maridhiano. Wa wenzenu akishinda leo, kesho anaweza kushinda mtu wenu.

Chukulieni yote kwa utulivu kwani mwisho wa siku, tunabaki Watanzania wale wale wenye upendo, utani, na imani kwamba kesho itakuwa bora.

Demokrasia siyo tu kupiga kura, bali ni maisha ya kawaida. Tustahimili baada ya matokeo kama vile hakuna kilichobadilika. Ukiona mambo yamekuwa kinyume na matarajio yako wala usikufuru.

Mshukuru Mungu na useme "aliyeshinda anatosha". Maisha mengine hayana budi kuendelea baada ya jambo hili kupita.